The Truman Show .. بعد ما كبرت شوية

- مقدمة ضرورية
دي تقريباً أول مرة أكتب فيها,كان نفسي أكتب أكتر من كده بس عارف إنكم هتزهقوا بسرعة (كنت زيكم زمان)
يا رب أعجبكم...و مستني رأيكم :)
_________________________________________________________________

أنا شوفت الفيلم ده كتير, بس دي كانت أول مرة أشوفه من ناحية تانية..
بدأت أحس إن كل واحد عايش فيه جزء من ترومان..
أصحاب مزيفين ماشيين زي ضلك بس لو دخلت حتة ضلمة...هيختفوا !!
ناس حافظة السيناريو...هتقول ايه و امتى !!
و زي ما حاول يهرب و هو صغير و أبوه جري عليه و قاله أعرف حدودك..
ليه متكونش حدودي الكون نفسه ؟؟! ليه مجربش كل حاجة و أتعلم من غلطاتي ؟؟
ولا أقولكم بلاش عشان لما كان نقسه يطلع مستكشف الأبلة بتاعته قالتله أنت اتأخرت خلاص مفيش حاجة تستكشفها !!
يبقى أنا كده هاعيش عالة عالمجتمع و أمشي في نظام ديكتاتوري (بيقولوا عليه ديموقراطي) بيتحكم في كل نفس باخده !!
و أعيش زي جدودي ما عملوا بمبدأ "الي تعرفه أحسن من الي متعرفوش"..

و لما حاول يهرب بسيارته بس الطريق اتقفل قدامه و نزل يجري و يعافر عشان يحرر نفسه بس اتمسك برضو..
هتلاقي ناس كده بتمنعك من إنك تطور نفسك عشان يمكن هو محققش أحلامه و مش عايز غيره يحققها..

أو اخر الفيلم...
لما حاول يحرر نفسه و يهرب بعد ما قرب ينتحر خلاص من البارانويا..البحر وقف ضده و حاول يمنعه
بس كان مستبيع و مش فارقة معاه و مستعد يعمل أي حاجة بس يهرب من المجتمع المثالي الي عايش فيه..
و كان هيموت في سبيل تحقيق هدفه و مطلعش جبان و خايف زي المخرج ما كان متوقع (إد هاريس الي مثل دور المخرج ده عبقري)

و اتصدم لما وصل لطريق مسدود و معرفش يكمل..
هى كده الحياة هتصدمك في أغرب الأوقات بس صدقني لو دورت و كملت هتلاقي باب الخروج زي ما ترومان عمل...
 

أنا هاعيش و أكسر المسار الإجباري و هتكون حدودي آخر الدنيا...

محمد حازم شلبي (بارانويا مراهق)
14\9\2011

موضوع تعبير

بسم الله الرحمن الرحيم

موضوع تعبير، متشكل و متزوق، كل شويه بيتين شعر، على كام حديث نبوى شريف و ايه قرانيه

ايش فهمك فى الكلام؟ دا فن اصله، يعنى مينفعش تروح تكلم كبير و تقله: ازيك ياض! تبقا انت حمار و مبتعرفش تكتب تعبير!

طب و هنكتب ازاى؟ ولا هنتكلم ازاى؟ لما ابوك و امك و خالك و عمك و جدك و جدتك و اخوك و طوب الارض مبيعرفوش؟

ازاى تبقا فى الشارع و تسمع سب دين؟ و تقول عادى، اه ماهو بقا عادى

تبقا ماشى مع اختك ولا امك و تلاقى لفظ زباله، و امك تقولك ايه الالفاظ دى يا رب ارحمنا، مع انها ممكن تكون لسه قيلالك يابن الكلب!

طب و مستنين مننا ايه؟ مستنين ايه من عيال كل اهلهم كدا؟

لما تمشى و تلاقى واحد طالع عينه من الفقر، و ابوه بيسبلوا 100 دين من التعب و القرف دا لو مطلعش معقد يبقا هو معقد!

كل شويه شتيمه و كلام زباله، متستنوش مننا حاجه نضيفه

جيل بقاله 30 سنه تحت التراب، اخره يعترض على الاقل منه، اعترض علينا لما تكون انت صح :@ عشان كدا احنا اعترضنا عالظلم

اصل العيب مش فيكوا، كان فى اللى قبليكوا

ناس بدون تعليم، انتشر الجهل و الغباء، مع اهل الشتيمه فى بقهم زى الرياله

بقا الكبير زى الصغير، دا ياض و دا عيل *** و دا راجل ابن *** و شوفت ال***

حتى بقينا بنوصف الحجات الحلوه بشتيمه، شوفت الفيلم ابن *** دا جامد ***

عايزين ايه طيب؟ عايزين ناس شربت الكلام دا يقولوا كلام جميل؟

انا بعمل كدا، انا زيك، انا مش رسول مش انا اللى ربنا اصطفانى، فيه ناس كويسه، مأثرش فيها!

بس عشان انا زيك و بحاول ابقا غير، بحاول انتقد نفسى و انتقدك

طب نشوف ايه الحل:

1-بطل شتيمه!

2-بطل شتيمه!

3-فرق بين كبير و صغير، متخليش ابوك زى صاحبك، هو هيقدرك برده!

4-بلاش تقول حلو ن**، ليه متقولش حلو جدا، ماهى جدا دى يعنى كتير بردو :D

5-استغفر ربنا، و افتكره،مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ

دى مش كل الحلول، عندك مثلا انك تفهم كل الناس الحجات دى و توريهم انهم غلط

يلا ربنا يرحمنا و يرحمكم!

سلامو عليكوا!