موضوع تعبير
بسم الله الرحمن الرحيم
موضوع تعبير، متشكل و متزوق، كل شويه بيتين شعر، على كام حديث نبوى شريف و آيه قرآنيه
ايش فهمك فى الكلام؟ دا فن أصله، يعنى مينفعش تروح تكلم كبير و تقله: ازيك ياض! تبقى أنت حمار و مبتعرفش تكتب تعبير!
طب و هنكتب إزاى؟ ولا هنتكلم إزاى؟ لما أبوك و أمك و خالك و عمك و جدك و جدتك و أخوك و طوب الارض مبيعرفوش؟ إزاي تبقى في الشارع و تسمع سب دين؟ و تقول عادي، اه ما هو بقى عادي
تبقى ماشى مع أختك ولا أمك و تلاقى لفظ زباله، و أمك تقولك ايه الألفاظ دي يا رب ارحمنا، مع إنها ممكن تكون لسه قايلالك يا ابن الكلب!
طب و مستنين مننا ايه؟ مستنين ايه من عيال كل أهلهم كده ؟
لما تمشي و تلاقي واحد طالع عينه من الفقر، و أبوه بيسبلوه 100 دين من التعب و القرف ده لو مطلعش معقد يبقى هو معقد!
كل شويه شتيمه و كلام زباله، متستنوش مننا حاجه نضيفه
جيل بقاله 30 سنه تحت التراب،أاخره يعترض على الأقل منه، اعترض علينا لما تكون انت صح :@ عشان كده احنا أعترضنا على الظلم
أصل العيب مش فيكم، كان فى اللى قبلكم
ناس بدون تعليم، انتشر الجهل و الغباء، مع أهل الشتيمه فى بقهم زى الرياله
بقى الكبير زى الصغير، دا ياض و دا عيل *** و دا راجل ابن *** و شوفت ال***
حتى بقينا بنوصف الحجات الحلوه بشتيمه، شوفت الفيلم ابن *** دا جامد ***
عايزين ايه طيب؟ عايزين ناس شربت الكلام ده يقولوا كلام جميل؟
أنا بعمل كده، أنا زيك، أنا مش رسول مش أنا اللي ربنا اصطفانى، في ناس كويسه، مأثرش فيها!
بس عشان أنا زيك و بأحاول ابقى غير، بأحاول انتقد نفسى و انتقدك
بس اتضح إن أنا غلطان!! ايوه فجأه و بدون مبرر أصبحت الشتيمه و الاباحه عامل جذب مهم!
لا لا استنى أنت عارف إن البنات الروشين بيشتموا؟ اه طب تعرف انك لو مش بتشتم تبقى أنت عيل مؤدب؟
فاهم يعنى ايه مؤدب ؟ دى حاجه اخر قلة ادب يبنى والله
ادخل على تويتر، هتلاقى أعلى ناس عندهم فولورز اللى بيشتموا، فى بنات بتبقى الشتيمه عندها أسهل بكتير من الولاد
ايها ادخل كده على بنت عاديه ببتكلم عادى و كلام كويس، و واحده تانيه بتشتم هتلاقى النسبه بينهم 1:100
يعنى كل واحد عند المحترمه قصاده 100 عند اللى بتشتم و فكراها فلاحه
من اشهر الناس على تويتر هو الخرم، اه ده من أكتر الناس اللى بتشتم شوف الفولورز عنده كام ؟ 30 الف ؟ اتفاجئت ؟ لا لا متتفاجئش
كنت بقولك تمشي فى الشارع تلاقي أمك أو أختك تقولك ايه الألفاظ اللي بنسمعها دي، شويه و هتلاقي أمك و أختك سكتوا!
بعد كدا هندخل فى مرحله اسوأ هى مرحلة إن خلاص الشتيمه هي جزء من الشخصيه
مش لازم شتيمه، أى فعل أبيح شتيمه , حركة , ايحاء ، تفكير
خلي واحد كده يقولك أنا باخد فى المركز الفلاني
أيوه بالظبط بياخد درس، كان أول تفكير جه فى دماغك هو الأبيح، لا ده مش أول تفكير ده كمان أخر تفكير
أنت أول ما سمعت الجمله مفكرتش غير فى كده و لو بهزار
مش عارف هتخلص من المشكله دى إزاي، احنا بقينا عايشين على أساس إن الأباحه هي الأساس
يعنى هتقولي أنا هادخل على تويتر، هانصح واحد و أقوله على فكره الشتيمه غلط، هيشتمك و يقولك مش عاجبك اعملى انفولو ايوه هى سياستنا بقت كده
قلتلك قبل كدا سوء تعليم، فساد فوق و تحت، كل الناس بتسرق تشتم و تنهب و تعمل أقبح الأفعال
مش الحل فى دول دينيه، الحل فى نفس مؤمنه، فى نفس خاشعه
أنا ولله الحمد، حاولت زيك اه أنت مش حاولت تبطل شتيمه؟
حاولت و لكن كنت بتشتم، كانوا يقولوا لي "يا واد يا مؤمن"
حتى الشيوخ بتوعنا بقوا بيشتموا
الشتيمه دلوقتى بقت: أنت بتذاكر؟ أنت عيل دحيح، شتيمه أبيحه
أنت بتصلى؟ بقيت مؤمن ياض، شتيمه أقبح
أنت بطلت تشتم؟ هتعملي فيها مؤدب ب*** أمك؟ ما احنا دفنينه سوا
و كأن التخلص من العادات السيئه أصبح هو السئ، اه
بيقولك لو نقطة حبر نزلت فى كبايه هتعكر الكبايه كلها، طب ايه رأيك لو منعنا النقطه دي؟
ايه رأيك لو بطلت أنا و أنت بس .. احنا الاتنين نبطل؟
أى حد يفتح بقه بشتيمه فيك يكون ردك: احترم نفسك! أنا بطلت شتايم
ايوه أنا مبصليش و مش باصوم و كافر: بس احترم نفسك و لم لسانك
غصب عن عينه هيسكت، أنت الصح خليك فاكر و واثق إنك أنت الصح
أنت اللي هتغير مش هما اللي هيغيروك
لو بقينا 50 واحد فى وسط 50 مليون بعد كده مليون واحد بقينا كويسين و اتعلم مننا مليون
مش هنعلم اللي قبلنا، لأ هنعلم اللي بعدينا هنعلم جيل الثوره، الجيل اللي ناشئ فى وطن حر
ناشئ على عادات سليمه هيعرف يقول لأ
خلي بالك قبل ما يطلع الجيل ده بيكتب موضوعت التعبير غلط
بتدخل الشيتمه محل الآيه و الأباحه محل الحديث و و و و
تعالى نحافظ على الناس الكويسه، و نقولهم احنا كمان كويسين و هنبدأ بنفسنا و بلدنا هتتغير
بعيداً عن انتمائي لأي دين و بالرغم من إني مسلم و فخور بس أقولك
مفيش دين مسيحى أو يهودى بيحلل الشتيمه و القباحه
ايوه اليهوديه ثم المسيحيه ثم الإسلام، هي أديان نزلت حسب النمو العقلى للإنسان
كل الأديان قبل الإسلام كانت نازله لهدف رخاء البشر و إقامة العدل و مقاومة النفس
اه مقاومة رغبات النفس الدنيئه
خلاص أنا و أنت وصلنا لحل إن احنا هنمشي على الحق و محدش هيقدر يوقفنا
انا مش بكلمك كأنى شيخ أو داعيه، أنا بكلمك على أساس اجتماعى بحت بدون انتماء ديني
بس لو في انتماء ديني هقولك دينك و ديني و دينهم بيقولك تتعامل بالخير و الاحترام هتلاقي خير و احترام
هتلاقى ثواب ربنا دنيا و اخره، هتلاقي معامله كويسه، كل الناس تحب تساعدك بكلمه حلوه و بابتسامه
خلي حياتك موضوع تعبير، ذوقها بابتسامه , بنكته , بضحك
مش لازم تجذب ناس بشتيمه، مش لازم تمدح حد بشتيمه
مش لازم حاجات كتير، أبداً و غير خصلة واحدة ، هتتعدل معاها حجات كتير
لو أنت مسلم , مسيحي , يهودى , كافر ، متتعاملش ضد غيرك علىأساس دينه
لو أنت أسود , أبيض , أحمر , أخضر , بنفسجي حتى، متتعاملش بلون اللي قدامك
و قلتلك خلي حياتك موضوع تعبيرك، تموت مرتاح
أخرتك الجنه إن شاء لله، دنيتك كانت جنهه
الناس فاكرينك، الراجل أو البنت اللي بي\تضحك و مبتسم\ة دي\ه
ده كان ذوق أخلاق
(أنا حاسس إني متأثر ببتوع قناة الناس) :D
بس كده يا سيدي
أنا هاتغير، مش عايز ابقى بانصحك بحاجه وانا مبعملهاش ، أبقى منافق حقير فشخ
يا رب الموضوع يعجبكم يا ولاد الـ**** .. آسف آسف
"خلي بالك :"مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ
سلام عليكم !
